Le vache

Le vache a rumio.

S-ciasse 'ndrinta a le stalëtte,

ansema a fasson e manzëtte,

e an banfand a fan nivolëtte.

Le vache a frusto la cova

e le mosche nojose a preuvo a ciapè,

ma a j'è gnente da fè...

A tiro anans a rumiè.

Le vache a àusso la cova

e per tera a mòlo ij sò afè.

Le mosche nojose a continovo a volè

e gnanca per seugn ch'as faso ciapè.

Le vache a rumio.

Antant l'aria ass fa neira...

ai riva la neuit,

apress ëd la seira...

Le vache a deurmo.

S-ciasse 'ndrinta a le stalëtte,

ansema a fasson e manzëtte,

e an ronfand a fan nivolëtte.

Le vache a seugno.

A seugno 'n cel ciair... le rondolëtte...

a taco a sautè come 'd cavalëtte...

su, su a s'ausso col bati 'd j'alëtte

e a vòlo come a fuisso 'd farfalëtte.

Le vache a vòlo.

Da 'nsima le nivole a taco a mirè,

a ausso la cova ch'a l'han da darè

e a seugno alegre 'd pudej bombardè

là 'n fond al pais ël ciabòt dël maslè...

Ma peuj ass dësvijo.

Le mosche nojose a preuvo a ciapè...

a frusto la cova...

j'è gnente da fè...

A l'è già matin:

ël maslè ant la stala a intra 'ndrin

e, quatr a gnun, a pòrta via 'n bocin.

E le vache a penso,

a penso a sò destin.

"Cò a l'è la vita ant cost mond?

Ancheuj soma sì, tacà, a nòstr pòst:

doman soma a fëtte su 'n cabarèt rotond...

un bel gnòch ëd bujì con testin-a... o n'aròst..."

Gian Marietta